இந்தியா-​தென் ஆபிரிக்க அணிகளுக்கு இடையிலான முதல் டெஸ்ட் நாகபுரியில் நாளை​ தொடங்குகிறது.​ நாகபுரி வந்துள்ள இரு அணியினரும் தீவிர பயிற்சியில் ஈடுபட்டுள்ளனர்.​ இந்திய அணியை எதிர்கொள்வது குறித்து தென் ஆபிரிக்க அணித்தலைவர் கிரேம் ஸ்மித் கூறியது:


இந்திய அணி தற்போது முதலிடத்தில் உள்ளது.​ இதன் மூலமே அந்த அணியின் பலத்தை நாங்கள் அறிந்து கொண்டுள்ளோம்.​ எனினும் இந்திய அணியை விட சிறப்பாக விளையாடுவோம் என்ற நம்பிக்கை எங்களுக்கு உள்ளது.​ இந்திய அணியை எவ்வாறு எதிர் கொள்வது என்பது குறித்து திட்டமிட்டு வைத்துள்ளோம்.​


இந்திய அணியை வீழ்த்தி டெஸ்ட் தரவரிசையில் முதலிடம் பிடிப்போம். சொந்த மண்ணில் இந்திய அணிக்கு எதிராக தொடரை கைப்பற்றுவது என்பது சவாலான விஷயம்தான்.​ ​ இந்திய அணியின் வீரர்கள் அனைவரும் சிறப்பான ஆட்டத்தை வெளிப்படுத்தி வருகின்றனர்.​ எனினும் எங்கள் அணியும் தொடர்ந்து வெற்றிபெற்று வருகிறது.​ நாங்கள் மிகவும் நம்பிக்கையுடன் இந்தியாவுக்கு வந்துள்ளோம்.​ முழுத்திறமையையும் வெளிப்படுத்தி வெற்றி பெறுவோம் என்றார் அவர்.


இரண்டு போட்டிகள் கொண்ட இந்த டெஸ்ட் தொடர் இரு அணிகளுக்குமே மிக முக்கியமானது.​ ஏனெனில் இந்திய அணி 125 புள்ளிகளுடன் டெஸ்ட் தர வரிசையில் முதலிடம் உள்ளது.​ தென் ஆப்பிரிக்கா 120 புள்ளிகள் பெற்று ​ 2ஆம் இடத்தில் உள்ளது.​ இதில் ஒன்றில் தென் ஆப்பிரிக்கா வெற்றி பெற்று மற்றொன்றை டிரா செய்தால் கூட இந்திய அணி இரண்டாமிடத்துக்குத் தள்ளப்படும்.​


இது தவிர சிறந்த டெஸ்ட் வீரர்கள் பட்டியலில் இந்திய அணியில் கெளதம் கhம்பீர் முதலிடத்தில் உள்ளார்.​ அடுத்தபடியாக கிரேம் ஸ்மித் உள்ளார்.​ எனவே தனிப்பட்ட முறையிலும் இந்த இரு வீரர்களுக்கும் இந்த தொடர் சவாலானதாகவே இருக்கும்.